شروقية من ديوان حفنة غزل/بقلم :الشاعر راضي يوسف مشيلح/لبنان
شروقيه من ديواني حفنة غزل
،،،،،،،،،،،،،،،،،،،،،،،،،،،،،،،،
قطّبت تمي بخيوط الصمت والاحزان
وحلفت طول العمر ما عود حاكيكي
وقعدت فتّش لحتى اشتري النسيان
بلكي ان لقيتو القلب يقدر يجافيكي
نهاري قضيتو ركض وبليلتي سهران
وللروح قلت اصبري وخبي بلاويكي
لقيت قلبي قفز كنو فرخ شيطان
لما مرقتي بدي بأسمك يناديكي
تخمين طيفك لزق ع مراية الوجدان
وصاير ضروري عليكي روح اشكيكي
ضبي خيالك بِكفي مهزله وبهتان
شمعات عمري انطفوا بعتمة لياليكي
ما ضل عندي زهر يطعم نحل نيسان
وماكول غير الشهد ما كان يرضيكي
ال مثلي معثار انا ومن عيشتو زهقان
ان كنّك عطشتي ما عندو مي يسقيكي
وان ما اقتنعتي بكلامي وطالبه برهان
تا تتركيني اطلبي ال بدك تا اعطيكي
بس ان لقيتك قصدتي ترجعي اللي كان
بخلي دموع الشقا من العين تمحيكي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
بقلم الشاعر راضي يوسف مشيلح
About The Author
إرسال التعليق