قصيده تراثيه لبلدة بعقلين الشوف الحبيبه //الشاعر الدكتور رفيق عزبا
قصيده تراثيه لبلدة بعقلين الشوف الحبيبه
بقلم://الشاعر الدكتور رفيق عزبا
سفير الانسانية والثقافة العربية في مونتريال
لدى منتدى ثورة قلم وعضو هيئته الادارية
———————
لما الشمس تشرق على بعقلين
فوق تلالا السبع والوديان
والأرز تاكي على الشربين
ومفلفش الوزال عالريحان
عالحور توعى رفوف لْحساسين
و عا جنينة التفاح والرمان
ترفرف فرح و تغرد تلاحين
و بعدو الندي عالزنيقة نعسان
من الودايا بتطلع النسمات
بين البيوت تفيق الوردات
والديك تلحق صيحتو الغيمات
بكير تا يوَعي الفلاحين
حزور فيها دَحدحو النحلات
هالخزام العامل شميلات
من العبير يقَطرو العسلات
ويعملو مشاوير عالقفران
برأس الذيب النحلات حَنو
لشيخ الآخذي البركات منو
طيور الحمام فراخها جَنو
الملول لاقي عماد عالسنديان
راس الجاموس يغازل الغيمات
ورأس النحل يتجدب قبالو
لشميس بعدو فارش حرامات
كفرحصيد تغار عا تلالو
المرج عم يلعب مع فراشات
سحر لوحه مزَهزْها بالوان
و القشايا كرومها من بعيد
توعى عا صوت البلبل الغريد
تحكي البيادر بالوما بتنهيد
وخلة الضيعه جمالا يزيد
عالشمس يوعى كرمهاالغفيان
والارض. طابت والربيع مروج
شقيق يمسح دمعة الوحواح
جنه زهور بعرسها بتموج
والمعول يغني ورا الفلاح
زنود الصبايا تعَشب العرشان
عفلاحة الكرمات والزيتون
تملي الصبايا جرّار من لعيون
والمجرفي تمشي ورا الفدان
هيكي وعينا عالطهر بكير
عالمحبي وطيب قلب كبير
و بهداوة بال وراحة ضمير
و بعدنا بنحبها وبنقول
بعقلين بعدا للحلا عنوان
—————–
رفيق عزبا ، مونتريال ١٣-٣—٢٠١٧
About The Author
إرسال التعليق